شتێکی سەرسووڕهێنەر نییە ڕووسیا فڕۆکەیەکی بەدەست تورکیا بخرێتە خوارەوە و بەرپرسێکی بالیوزخانەی وڵاتەکەی لە تورکیا بە دەست پولیسێکی تورک بکوژرێت و هێشتا لەبەر بەرژەوەندی ئابووری دەست لە دۆستایەتی درۆینەی خۆی بەرنەدات و کورد بە دەست دوژمنە دراوسێیەکانی قەلەملار نەکات.
بە دوور کەوتنەوەی تورکیا لە بەرەی ئەمریکا و وڵاتانی ئەرووپا، ڕووسیا دەیەوێ پێوەندی بازرگانی و دیپلۆماتی خۆی لە گەڵ تورکیا بگەینێتە ئاستێکی بەرز و بەرچاو، هەروەها دەیەوێت بەرەیەکی بە هێز لە وڵاتانی چین و ڕووسیا و ئێران و کۆریای باکوور و….هتد، بە بەشداری تورکیا دروست بکات بۆ بەرنگاربوونەوەی هەژموونی ئەمریکا و وڵاتانی ئەورووپای لە ئاسیا.
کورد بەس ئامرازێکی ئاسای دەستی زلهێزەکانە و هیچ بەرژەوەندییەکی ئەوتۆی نییە تاکوو ڕووسیا و وڵاتانی زلهێز پشتیوانی لێبکەن، تا ئەو کاتەی کە ئیشیان پێ بێت بۆ بەرنگاربوونەوەی تیرۆر و هەر کاتێکیش کێشەیەکیان لە گەڵ ئێران و عێراق و سووریا و تورکیا دا هەبێت بۆ بە گژدا چوونەوەی ئەم چورا وڵاتە دەستکردە کەڵکمان لێ وەردەگرن، بەرپرسانی وڵاتی ڕووسیا دایم دووپاتی دەکەنەوە کە کورد چی هەیە تاکوو ئێمە و ئەمریکا و وڵاتانی زلهێزی دیکە پالثشتی بکەین؟ بۆیە ڕووسەکان دایم ئەم قسەیە دووپات دەکەنەوە و دەڵێن: ئەمریکا خەڵەتاوە و هەڵەی کردووە دڵی بە هێزە کوردیەکان خۆش کردووە!چۆن کورد ئەو هێزە نییە کە ئەمریکا دڵی پێ خۆش دەکات.
دەبێ ئێمەی کورد چ بکەین تاکوو ببین بە هێزێکی کاریگەر و بەرچاو تاکوو زۆربەی وڵاتانی جیهان ڕێزمان لێبگرن و پشتمان چۆل نەکەن؟
یەکەم: لۆبییەکی باشمان هەبێت لە هەموو ئەو وڵاتانەی کە کاریگەری باش و گەورەیان هەیە لە ئاسیا، ئەم کارەش بە پارە و داهاتێکی گەورە دەکرێت.
دووهەم: باری دیپلۆماسی و پێوەندی خۆمان لەو وڵاتانەی کە باسمان کرد بگەینینە ئاستیکی بەرز و بەرچاو.
سێهەم: هۆشیاری و نەتەوەپەرەستی و خۆشەویستی خاک لەسەرەوەی هەموو کردارەکانی ڕۆژانەمانەوە بێت.
چوارەم: با ژێرخانی ئابووری و کشتوکاڵ و وەبەرهێنانی خۆماڵی و….هتدی خۆمان هەبێت.
پێنجەم: ڕێگە چارەیەکی باشمان هەبیت بۆ دروستکردنی یەکڕێزی زمان و کلتوور و مێژوو و…هتدی کوردی.
شەشەم: ڕێز لە هەموو بیرو باوەڕ و زاراوە و ناوچە و داب و نەریت و….هتدی کوردەواری خۆمان بێ جیاوازی بگرین.
حەفتەم: ئەرتەشێک یان هێزێکی تۆکمەی یەکگرتووی بەهێز دروست بکەین بۆ ڕۆژێک کە بەرنگاری دۆژمنانی کورد بینەوە.
هەشتەم: هێزێکی سایبێری و هاککەری و ئینتەرنەتی مان هەبێت بۆ هێرشکردنە سەر دامودەزگای ئەو چوار وڵاتە داگیرکەرەی
دراوسێمان لە کاتی هێرشکردنە سەر خاکی کوردستانا.
نۆیەم: لەباری پاراستن و هەواڵگێری و گواستنەوەی هەواڵ و زانینی پیلانی دوژمنانی کورد با کاریگەری باش و تۆکمەمان هەبێت پێش ئەوەی دوژمن دەستبکات بە هێرش کردن و پیلانگێڕی دژ بە گەلی کورد.
دەیەم: دەبێ نەوەی نوێمان لە قوتابخانە و لەسەر مێدیا و ڕۆژنامەکان و….هتد، فێری خۆشەویستی وڵات و زمان و کلتوور و مێژوو و…هتدی کوردی بکەین تاکوو سبەی بتوانن دونیا لە داخوازیەکانی کورد تێبگەینن و نەهامەتی کورد و کۆمەڵکوژ کردنی گەلەکەمان و نەبوونی وڵاتێک بۆ ئەم نەتەوە ٦٠ ملیۆنە بگەینینە دونیا و سنوورێک بۆ ئەو چوار وڵاتە دەستکردە دابنێین و دان بە مافە ڕەواکانی گەلی کورددا بنێن.
یازدە: پشت لەە وڵاتانەی بکەین کە لە ڕۆژانی تەنگانە بە هانامانەوە نایەن و ئێمە وەک ئامرازێک دەبینن و ئیشەکانی خۆیان بە ئێمە جێ بەجێ دەکەن، بیاندەینە بەر ڕەخنە و دژ بەوان خۆپیشاندانیانێکی بەرچاو بکەین و ڕیسوایان بکەین.
دووازدەهەم: لە تۆڕە کۆمەڵایەتیەکان و لە سەر مێدیا و کۆڕوکۆبوونەوە گشتیەکانمان یەک قسە و یەک وتار و یەک هەڵوێست بین و نەهامەتیەکانی خۆمان بە شێوەیەکی ڕێک و پێک و زانایانە بخەینە بەر چاوی دونیا و ئەو کەسانەی کە پاڵپشتی مافی مرۆڤ و وڵاتانی بێ نەتەوە و لێقەوماو دەکەن.
Comments
Post a Comment