هەرێمی کوردستان بووەتە شوێنی ڕاستکردنەوەی شتوومەکی بێکەڵکی تورکیا

هەرێمی کوردستان بووەتە شوێنی ڕاستکردنەوەی شتوومەکی بێکەڵکی تورکیا

کردنەوەی پیشانگای “کۆمپانیا تورکیەکان” لە هەرێمی کوردستان بووەتە بابەتێکی گەرمی مێدیا کوردیەکانەوە و بە شانازییەکی واوە باسی لێوەدەکەن، کە گوایا کوردستان پێگەیەکی گرنگی هەیە لە ناوچەکەدا؛ بۆیە کۆمپانیا تورکیەکان ڕووی تێدەکەن.

ئەمە لەکاتێکدایە کە شەڕو داگیرکردنی خاکی کوردستان لە هەرچوار لاوە بە دەست چوار هێزی دەستکردی داگیرکەری ئێران و عێراق و سووریا و تورکیا داوێنی گەلی کوردی گرتووە و بەرینادا، بەچەکی کیمیەوی و بۆمبی ناپاڵمۆ و بە فڕۆکە و چەکی قورس و بە هاوکاری گرووپە تیرۆریستەکان خوێنی ژن و منداڵ و گەنج و لاو، پیروپەکەوتە و پیاوانی ئەم وڵاتەیان ڕژاند و دەرژێنن و بەحەڵاڵی دەزانن، کەچەی هێشتا لە هەرێمی کوردستان بازرگانی لەگەڵ ئەو وڵاتانەدا بەردەوامی هەیە و ئەوان براگەورەن و ئێمە تاوانبار.

هاتنی کۆمپانیا تورکیەکان بۆ کوردستان نەک هەربێسوودە لە هەمان کاتدا زەرەرێک

ی گەورەی بە ئابووری کوردستان گەیاندووە.

چۆن کوردستان بووەتە شوێنی ڕاستکردنەوەی کەلوپەل و خواردن و خواردەمەنی و فلیم دراما و…..هتدی بێکەڵکی تورکی کە لە جیهاندا بایەخێک و کەڵک و مشتەری و کڕیاری ئەوتۆیان نییە.

خاڵێکی لاوازی هەرێمی کوردستان ئەوەیە تا ئیستا نەیتوانیوە ڕێگایەک دروست بکات و خۆی لەم سنوورە دەستکردانەی ئیران و عێراق و تورکیا و سووریا دووربخاتەوە، لەبەر نەبوونی سنوورێکی ئەتۆ لەگەڵ دەریای ناوەڕاست هەروەها لەگەڵ وڵاتانی عەرەبی خەلیج و وڵاتانی ئەرووپا و ئەمریکا، بۆیە تورکیاش لەم بارودۆخە کەڵک وەردەگرێ بۆ فرۆشتنەوەی ئەو “پێشماوانە”ی کە هاوردەی هەرێمی کوردستانی دەکات و بازرگانە کوردەکانی ئێمەش فەخر و شانازی پێیەوە دەکەن و پیشانگا

ی بۆ دەکەنەوە.

لەهەمان کاتدا ئابووری کورد سڕ دەکرێت، کورد دەبێت بە کڕیار، نەک فرۆشیار، بە هاوردەکردنی ئەو کەلوپەلانە و ئەو شتانەی کە باسمانکرد گەنجان و داهێنەرانی کورد دەبێ لە گۆشەی ماڵەکانیان دابنیشن و خەڵکانی دیکەی کوردیش بڕۆن لە نێو شەقامەکان دەستفرۆشی بکەن و کرێکارانی تورک و عەرەب و فارسیش بە جلوبەرگ و قات و ڕیبات و ئۆتۆمۆبێلی ئاخیر سیسستەمەوە لە کوردستان پۆز لێبدەن.

هاوردەکردن و کڕین و مووچەخۆرکردنی خەڵکی کورد و کردنەوەی کۆمپانیا و پیشانگای ئەم وڵاتانە لە هەرێمی کوردستان، پێگەیەکی گرنگ نییە بۆ هەرێمی کوردستان چۆن بە دەرچوونی ئەم کۆمپانیایانە لە هەرێم لە لایەنی ئەم وڵاتە دەستکردانەوە گوشارێکی زۆر دەکەوێتە سەر هاوڵاتیانی کورد و بەهەر قەپاتکردنێکی ئەو کۆمپانیایانە و سنوورەکانی ئەو وڵاتانە ئابووری کوردستان زۆر زۆر دادەبەزێت و تووشی داڕمان دەبێت.