ئەو هۆزانڤانە وەک دەردەکەوێت ناوی محەممەدە و خەڵکی (دینەوەر)ی ناوچەی کرماشانە:
ئەو هۆزانڤانە وەک دەردەکەوێت ناوی محەممەدە و خەڵکی (دینەوەر)ی ناوچەی کرماشانە، وەک لە هۆنراوەکانیدا دەردەکەوێت،
هەندێک لە هۆنراوەکانی لە ساڵی (٨٠١)ی کۆچیدا نووسیوە کە دەکاتە دەورووبەری ساڵی (١٣٩٨)ی زایینی.
ئەمەش ئەوە دەگەیەنێت، هۆزانڤان لە کۆتایی سەدەی چواردەهەم و سەرەتای سەدەی پازدەهەمی زاینیدا ژیاوە.
ئەو هۆنراوانەی مەلای پەرێشان، تا ئیستا لەبەر دەستدان هۆنراوەی ئایینی و بەڵکوو (ئایینزایین)، بریتین لە ستایشی پێغەمبەر(د.خ) هەر وەک ئەو کۆمەڵە هەڵبەستەی کە لەم سەڵانای دواییدا لە کرماشان چاپکراوە، زۆر بە سۆز چیرۆکی شەهیدبوونی “حەسەن و حوسەین” دەگێڕنەوە.
مەلای پەرێشان لە سەرەتای یەکێک لە پاڕاوەکانیدا دەڵێت:
خودا من بەندەی ناچیز و زەلیل،
گونام کەسیرەن، تاعەتم قەلیل.
چەنیم عەدالەت مەکەر ئەی کەریم،
ببەخشەم وە لوتف بە فەزلی عەمیم.
حەکیمی عەلیم کەس سڕنەزان کەس،
عەلیی عەزیم، زاتی وێتەن بەس.
لاڵای وەئیلحاح من بکەر قەبووڵ،
یاحەق و عیسمەت فاتیمەی بەتوول.
لێکدانەوەی وشەکان:
بەندە : کۆیلە، عەبد
ناچیز : ناچیزە، خراپە
گونام کەسیرەن: گوناحم زۆرە
وێتەن : خۆتان
لاڵا : پاڕانەوە
ئەمە سەرەتایەکی کورتبوو دەربارەی ئەدەبییاتی شێوازی گۆڕانی و پەیدابوون و سەرهەڵذانی، دواتر زۆر هۆزانڤانی گەورەی وەک( مەولەوی) و (مەلای بێسارانی) و (ئەحمەد بەگی کۆماسی) و (شێخ سیراجەدین) و (مەولانا خالیدی نەقشبەندی) شعیری ئایینی بەرزو سەر بە تەریقەتی نەقشبەندیان بەم زاراوە نووسیوەتەوە، لە ناو هۆنراوەکانی هۆزانڤانانی زاراوەی گۆرانی هەندێک تیشکی ڕێبازی ڕۆمانسی دەبینرێت، کە لە داهاتوودا بە ئیزنی خوا باسی دەکەین، هەروەها هەڵبەستی سەر بە ڕێبازی (ئەهلی حەق) بەم زاراوەیە نووسراوەتەوە، یا هۆزانڤانی گەوەی وەک (خانای قوبادی) داستانی (شیرین و خوسرەو)ی پێنووسیوەتەوە، کە شاکارێکی مەزن و ناوازەی ئەدەبی کوردییە.
یەکێکی تر لەو هۆزانڤانانی کە بە شێوەی(گۆران)ی هۆنراوەیان هەیە و بە پێشەنگ دادەنرێن و هۆنراوەکانیشی بەر قوتابخانەی کلاسیزم دەکەون لە ئەدەبی کوردیدا (بێسارانی)یە.
تعليقات
إرسال تعليق