ئەو جووڵە شۆڕشگێڕییەی پێشمەرگە و خەڵكی رۆژهەڵاتی كوردستان دەستیان پێ كردووە لەم دۆخە ئاڵۆزەی چارەنووسی كورددا لە بەشەكانی تری باشوور، رۆژئاوا و باكوری كوردستان، جوانترین ئومێدە كە هاتووەتە ناومانەوە، بۆیە بەردەوامی رۆژهەڵاتییەكان تا گەیشتن بە مافە زەوتكراوەكانی خەڵكی رۆژهەڵاتی كوردستان، “بەهاری كورد” دەگەیەنێتە لووتكە. رۆژهەڵاتییەكان بەهۆی ژیانی ژن و منداڵیان لە باشوور، كەوتوونەتە ژێر پاڵەپەستۆی قورس و پێویستیان بە هاوكارییە، یان ئەگەر هاوكاری ناكرێن، وازیان لێ بێنن خۆیان بڕیاری خۆیان بدەن، ئاخر ناوچەكە تەواو ئاڵۆزە و وەك دیارییەكە بۆ ئەو پارچەی كوردستان تا خۆیان پێشانی دنیای بدەن.
هەرێمی كوردستان كە 25 ساڵە رێگەی لە جووڵانەوەی رۆژهەڵاتییەكان گرتووە و ئەوانیش لە هەستكردنیان بە بەرپرسیارێتی و ستەمكاریی ئێران خۆیان پاراست لەوەی میواندارییەكەیان لە باشوور قورس بكەوێتەوە، بۆیە هەم بە هەستی بەرپرسیارانەی خۆیان و داوای هەرێمی كوردستان، ئێران خاوەن سنوورێكی ئارام بوو، بەڵام نەك ئامادە نەبوو گفتوگۆ لەبارەی مافی كورد لە رۆژهەڵات بكات، بگرە ئەو بێ دەنگییەی گۆڕیبوو بۆ چەوساندنەوەی زیاتر و لەداردانی دانیشتووانی ناوخۆ. ئەم ناچالاكییە ئەگەر بۆ 20 ساڵی رابردوو لۆجیكی بووبێت، ئەوە پێنج ساڵە لەوەتەی وڵاتانی عەرەبی خرۆشاون، نەك بێ مانایە، بگرە حزبەكانی رۆژهەڵاتی رووبەڕووی پرسیاری جدی كردبووەوە بەوەی كەی دەتانەوێ خەباتەكەتان دەست پێ بكەنەوە و مافی كوردی رۆژهەڵات وەرگرن، لە ئاستێكی تردا خەڵكی لە ناوخۆ لەژێر توندترین ستەمدا دەژین و حزبەكانیش هیچ بەرنامەیەكیان نەبوو بۆیان جگە لە قسەی میدیایی كە هەندێك جار بێ ئومێدیشی دەكردن.
گرنگە لەوە تێبگەین ئەم قۆناغە و ناوچەكەیش دوای داعش كپ دەبنەوە، هیچ نەبێ بۆ چەند ساڵێك، بۆیە لەدەستدانی ئەم دەرفەتە، كەمتەرخەمییە و هیچی تر. پرسی رۆژهەڵات ئێستە گەرمە بە تەواوی تەنیا رێبەرایەتی دەوێت، ئەگینا هەم بەرگری و هەم چالاكییەكانی تری ناوخۆ خەڵك خۆی دەیكات، مەگەر كوردێك 37 ساڵ ستەمی لێ كرابێت لە ئێران، ئامادە نییە گیانی خۆی ببەخشێ بۆ ئازادی؟ پێویستە حزبەكان نیگەرانیش نەبن لە كەمی پێشمەرگە، چونكە لە دۆخی گواستنەوەی ئەو چالاكییانەی ئێستە بۆ شەپۆلێكی فراوانتر، هەزاران پێشمەرگە لە دەوریان كۆ دەبێتەوە. رەنگە بگوترێ ئێران گەورەیە و چەكی قورسی هەیە، بەڵام ئەوەش روونە كە ماڵێك بە ستەم پێكەوە نرابێ، لە هەر لایەكییەوە كونی تێ بكەی، هەموو ماڵەكە لەرز دەیگرێ.
پرسی هەرە گرنگ لەم خەباتەی رۆژهەڵاتییەكاندا، پێوەستە بە هەرێمی كوردستان و هەست دەكرێ پاڵەپەستۆ دەستی پێ كردووە بۆ بێ دەنگكردنی ئەو بەشەی كوردستان، بەڵام ئەمە بەرپرسیارێتییەكی مێژووییە و 25 ساڵی رابردوویش پێی گوتین ئێران نە هیچی بۆ هەرێم كرد جگە لە كاڵای خراپ و بەسەرچوو و تێكدانی پێوەندیی حزبی لە باشوور، نە هیچ حیسابێكی بۆ پرسی رۆژهەڵات كرد و داوای لە حزبەكانیان كردبێ گفتوگۆ لەبارەی 12 ملیۆن دانیشتووانەوە بكەن، بۆیە چیتر حەق نییە حكوومەتی هەرێم دەستوەرداتە كاروباری رۆژهەڵات و لێگەڕێن خۆیان بڕیار بدەن، من گومانم نییە لەوەی پێشمەرگەیش نەبێ لە سنوور، ئێران هەست بكات دارەكان هەر ساڵێك جوان سەوز بوون و بەروبووم زۆرە، تۆپبارانی دەكات بۆ ئەوەی جووتیاری كورد سوودی لێ نەبینێ. ئیتر بۆچی فشار بۆ حزبەكانی رۆژهەڵات دێنن؟ هەموو شتێك روونە و كۆمار خۆی بە ئاشكرا دەڵێ، “دژی هەموو خواستێكی نەتەوەیی كوردین”.
هاوكات لەگەڵ ئەم بەرپرسیارێتییەی باشووری كوردستان، ئەركی سەرشانی حزبەكانی رۆژهەڵات قورسترە، چونكە چیتر پاساو نەماوە و كاتیش زۆر درەنگە تا بڵێن لەبەر هەرێمی كوردستان خەبات ناكەین، بێگومان بن خەڵكی ئێرە دڵخۆش دەبێ ئەگەر ئێوە دەستكەوتتان هەبێ بۆ رۆژهەڵات و ئامادەیشن باخەكانیان بە تۆپی ئێرانی بسووتێ، چونكە لەوەتەی هەیە سووتاوە و تازە نییە.
ژیانی خێزان و منداڵ، ئەو خاڵەیە كە حزبەكانی رۆژهەڵاتی تووشی دڵەڕاوكە كردووە، بەڵام ئەگەر بڕیارتان داوە خەبات بكەن، بچنەوە ناو رۆژهەڵات و سنوورەكانی و خێزانەكانتان جێ بێڵن تا پرسێك یەكلا دەبێتەوە، خۆ ئەگەر هەر كەس و وڵاتێك ئەزیەتی ژن و منداڵ بدات، ئیتر باشترین كارتە بەدەست پیاوانی رۆژهەڵاتەوە كە خۆیان بەخت بكەن لەپێناو دەستەبەركردنی ئازادی بۆ خەڵكەكەیان لە رۆژهەڵات.
بۆیە چیتر ئەو پاساوەی “لەبەر هەرێمی كوردستان خەبات ناكەین”، خۆشاردنەوەیە لە بەرپرسیارێتی و بەجۆرێك لە جۆرەكان داننانە بە كۆڵدان لە خەبات و بەردەوامبوونی ژیانی ناو لاندكرۆزەر و هەوای فێنكی سپلیت. لە كاتێكدا ئەو جووڵانەوەیە، پێشمەرگەكان تێكەڵ دەكاتەوە و فشاری ئەوەش ناهێڵێ كە بە حزبەكان بگوترێ تێكەڵ ببنەوە، بەو پێیەی پرسی گەورەتر هاتووەتە ئاراوە كە تێكۆشانە بۆ ئامانجی نەتەوەیی.
وشە: سەرباز ساڵح
تعليقات
إرسال تعليق