ئەو ٢٢ چەکدارەی حەشدی شەعبی کە لە شارۆچکەی ئەلبوکەمالی سووریا بوردمان کران و کوژران کاری ئیسرائیل بوو.
بەگوێرەی راپۆرتێکی ئاژانسی فرانس پرێس، دوێنێ لە هێرشی فرۆکەیەکی
نەناسراو بۆ سەر شارۆچکەی ئەلبوکەمال: “٥٢چەکدار کە پشتیوانی لە حکوومەتی
سووریا دەکەن و زۆربەیان عێراقین کوژراون”.
لای خۆیانەوە هێزەکانی حەشدی شەعبی کوژرانی ٢٢چەکدار و برینداربوونی
١٢دیکەی لەو هێرشەی دوێنێ راگەیاند و وەزارەتی دەرەوەی عێراقیش ئیدانەی
هێرشەکەی کرد.
راستەوخۆ دوای هێرشەکە، حکوومەتی سووریا و حەشدی شەعبی، ئەمەریکایان تۆمەتبارکرد بەو هێرشە، بەڵام واشنتن رەتیکردەوە.
لەو بارەیەوە ئەمڕۆ (١٩/٠٦/٢٠١٨) بەپرسێکی ئەمەریکی کە نەیویستووە ناوی
ئاشکرا بکرێت لە رێگای تۆڕی هەواڵی سی ئێن ئێنی ئەمەریکی گوتوویه‌تی: ”
ئیسرائیل، نەک ئەمەریکا لەو هێرشە بەرپرسیارە کە بۆتە هۆی کوژرانی دەیان
چەکدار لەسەر سنووری عێراق و سووریا”.
ئەو بەرپرسە دەشڵێت: “پینتاگۆن بە روونی رایگەیاندووە، ئەوان ئەو هێرشەیان ئەنجام نەداوە”.
پێشتر بینیامین نەتانیاهۆ، سەرۆک وەزیرانی ئیسرائیل، لە پەیوەندییەکی
تەلەفونی لەگەڵ ڤلادمێر پوتین، سەرۆکی رووسیا، و مایک پۆمپیۆ، وەزیری
دەرەوەی ئەمەریکا، رایگەیاندووە: “ئێمە کردەوەمان دەبێت و کردەوەشمان هەیە
دژی هەوڵەکانی ئێران وهاوپەیمانەکانی بۆ بەهێزکردنی هەژموونی سەربازی
ئێران لە سەر سنوور و ناوەوەی وڵاتی سووریا”.
Comments
Post a Comment