خەوننامەی کوردی بەشی چە؛ چاڵ-بیر:
ئیبن سیرین دەڵێ: چاڵ لە بنەڕەتدا واتای ژن دەگەینێت.
ئەگەر بینی بۆ هەڵکەندنی بیر، کەسێک سوپاسی کرد، واتە کەسێک دبێتە نێوانگیری ئەو، لەگەڵ ئەو ژنەی کە دەیخوازێت و دەیەوێ بە فروفێڵ ئەو ئافرەتە بکاتە ژنی ئەو پیاوە، چونکە هەڵکەندنی بیر فێڵ و تەڵەکەیە.
ئاوی بیر لەخەودا، پارە و سامانی ژنە.
ئەگەر کەسێک بینی لە چاڵێک یان لە بیرێک ئاوی دەخواردەوە، واتە ماڵی ژنەکەی دەخوات.
ئەگەر لە چاڵێک ئاوی خواردەوە کە بە خشت و کەرپووچی سوورەوەکراو هەڵچێنرابوو، نیشانەی پارە و سامانی ژنە.
ئەگەر کەسێک بینی بیری هەڵکەند و ئاوی لێ هەڵنەدەقوڵا، واتە ژنێکی هەژار و دەست کورت دەخوازێت.
ئیبراهیمی کرمانی دەڵێ: ئەگەر کەسێک دیتی ئاوی بیری خواردەوە و تامی ناخۆش بوو، واتە بە زۆر پارە و سامان لە ژنەکەی دەستێنێت.
ئەگەر بینی ئاوی بیری خواردەوە و ئاوەکە گەرم بوو، ئەوا بەهۆی ماڵ و سامانی ژنەوە، تووشی مەینەتی و ئازار دەبێت و بە گوتەی هەندێک لە لێکدەرەوانی خەو: نەخۆش دەکەوێت.
ئەگەر دیتی ئاوی بیر فێنک و خۆش بوو، واتە لە ژنەکەی خێر و قازانجی دەست دەکەوێت.
ئەگەر دیتی ئاوی چاڵەکە زۆر بوو، واتە ژنەکەی جوامێر و دەستکراوە دەبێت.
ئەگەر بینی ئاوی بیرەکە کەم بوو، واتە ژنەکەی پەست و سووک و چرووک و نەزان دەبێت.
ئەگەر بینی بیری هەڵکەند و زوو ئاوی لێ هاتەوە دەرەوە، واتە ژنەکەی نەخۆش دەکەوێت و پارە و سامانەکەی لەو نەخۆشییەدا خەرج دەکات.
ئەگەر ئاوی ڕەش یان بۆر و کەوە لە چاڵەکە هاتەوە دەرەوە، واتە تووشی خەم و مەینەتی دەبێت.
ئەگەر دیتی ئاوی سپی لە بیرەکە هاتەوە دەرەوە، واتە میراتی دەست دەکەوێت.
ئەگەر بینی ئاوی بیرەکە ڕۆچوو بە ناخی زەویدا و وشکی کرد، واتە ژنەکەی دەمرێت و پارە و سامانەکەی لەناو دەچێت.
ئەگەر بینیشی بیرەکە کوێر بوویەوە و ڕۆچوو بەناخی زەویدا، دیسان واتای مردنی ژنە.
ئیبراهیمی کرمانی دەڵێ: ئەگەر کەسێک دیتی دۆڵچەی خستە ناو ئاوەکەوە، تاکوو ئاو لێ هەڵگۆزێت و دۆڵچەکە کەوتە ناو بیرکەوە و پەتەکەی پچڕا، واتە منداڵێکی ناتەواوی (نوقسان)ی دەبێت.
جابری مەغریبی دەڵێ: ئەگەر بینی ئاوی لەبیردا هەڵدەگۆزی، واتە بە فروفێڵ پارە و سامان کۆ دەکاتەوە، بەتایبەت ئەگەر خۆی بیرەکەی هەڵکەندبێ.
ئەگەر بینی بە دۆڵچە ئاوی لە بیر هەڵگۆزی و لە ناو شتێکی تری دەکرد، واتە پارە و سامانەکەی خۆی بە باشی هەڵدەگرێت.
ئەگەر بینی ئەو ئاوەی کە هەڵی گۆزی، ڕژاندیە سەر زەوی، واتە پارە و سامانەکەی لە ڕێگای خێردا خەرج دەکات.
ئەگەر کەوتە ناو چاڵەکەوە، واتە دەکەوێتە ناو فێڵ و تەڵەوە.
ئەگەر بینی باخی ئاو دەدا، کە دەستی کەوتووە، ژن دێنێت، یانیش کەنیزەک دەکڕێت.
ئەگەر بینی لەناو باخەکەدا میوە هەبوو، واتە منداڵیان دەبێت و هەندێک دەڵێن: ئەگەر بینی باخی ئاو دەدا، واتە لەگەڵ ژنەکەی خۆی جووت دەبێ.
ئەگەر دیتی چاڵەکە ئاوی تێ هات و ئاوی لەبەر دەڕۆشت، واتە ژنێکی دەوڵەمەند دەخوازێت و بەهۆی ئەو ژنەوە، ماڵ و سامان و ڕزق و ڕۆزی دەست دەکەوێت.
ئیمام جەعفەری سادق دەفەرمێ: بینینی چاڵ یان بیر لەخەودا، شەش واتای هەیە.
یەکەم: ژن. دووەم: کەنیزەک: سێیەم: زانایی. چوارەم: دەوڵەمەندی. پێنجەم: فێڵ. شەشەم: تەڵەکەبازی. هەروەها پیاوی بیرکەن لەخەودا، فێڵ و تەڵەکەیە.
تعليقات
إرسال تعليق