لە ماجدی ڵاند دوو کوڕ و کچێک گیان لە دەست دەدەن
لە رووداوێکدا لە شاری یاری ماجدی لاند لە شاری هەولێر، سێ کەس گیانیان لەدەستداوە.
سامان بەرزنجی، بەڕێوەبەری گشتی تەندروستی هەولێر بە تۆڕی میدیایی رووداوی
راگەیاند: بەهۆی رووداوێک لە شاری یاری ماجدی لاند، سێ کەس گیانیان
لەدەستداوە و دوو کەسیش بریندارن.
رووداوەکە لە دوای کاژێر ٢٣:٠٠ روویداوە، ئەوانەش کە گیانیان لەدەستداوە
خوشک و برایەک و کچە پوورێکیانن. رووداوەکەش بەو شێوەیە بووە کە لە یاری
(سکەتولمەوت) شەمەندەفەری مردن، بەرزکەرەوەیەک لە تەنیشتی یارییەکە بەهۆی
ئەوەی تووند نەبەستراوەتەوە یان با هەڵیکەندووە، بەربووەتەوە بۆ سەر
یارییەکە و لە ئەنجامدا بووەتە هۆی گیانلەدەستانی ئەو کەسانە و دوو کەسی
دیکەیش بریندار بوون.
هەروەها هۆگر عەزیز، گوتەبێژی پۆلیسی هەولێر، لەبارەی رووداوەکەوە گوتی، سێ
کەس گیانیان لەدەستداوە و دوو کەس بریندارن، هۆکارەکەش ئەوەیە کە
شەمەندەفەری یارییەکە بەهەر هۆیەک بێت لە شوێنی خۆی لایداوە .
رەنجە جەمال پەیامنێری رووداو گوتی، تەرمەکان گواستراونەتەوە بۆ داد پزیشکی
هەولێر و بریندارەکانیش لە نەخۆشخانە چارەسەریان بۆ دەکرێت.
تعليقات
إرسال تعليق